Франциянинг «Лион» клуби ва Аргентина терма жамоаси қанот ҳимоячиси Николас Тальяфико жамоасининг 2026 йилги жаҳон чемпионати финалидаги мағлубиятига изоҳ берди.
Лионель Скалони жамоаси Испания терма жамоасига 0:1 ҳисобида имкониятни бой берди. Трофей тақдирини қўшимча вақтда «альбиселесте» дарвозасига тўп киритган испан форварди Ферран Торреснинг голи ҳал қилди.
«Бу жуда оғриқли, буни инкор этмайман. Аммо яна бир бор финалга чиққанимиз ва майдонда бор кучимизни қолдирганимизни ҳеч нарса ўчира олмайди. Мен ушбу жамоанинг бир қисми эканимдан фахрланаман. Жаҳон чемпионатининг ҳар бир қадамида бизни қўллаб-қувватлаган барча аргентиналикларга раҳмат. Сиз биринчи кундан охирги кунгача қўлловингизни ҳис қилдириб турдингиз», — деб ёзди ҳимоячи ижтимоий тармоқларда.
Аргентина Шимолий Америкага амалдаги жаҳон чемпиони мақомида ташриф буюрган эди. Гуруҳ босқичида миллий терма жамоа Австрия, Алжир ва Иорданияни ортда қолдириб, биринчи ўринни эгаллади. Мундиалнинг плей-офф босқичида Жанубий Америка терма жамоаси Кабо-Верде (3:2), Миср (3:2), Швейцария (3:1) ва Англияни (2:1) мағлуб этган эди.
