Манбаларнинг хабарига кўра, каталонияликлар аргентиналик ҳужумчи Хулиан Альварес трансфери бўйича ишлар муваффақиятли якунланишига комил ишонч билдирмоқда. Футболчининг амалдаги клуби «Атлетико»нинг уни сотишни истамаслиги ҳақидаги баёнотлари «кўк-анорранглилар»нинг ишончига ҳеч қандай таъсир кўрсатмаяпти.

«Барселона» раҳбарияти футболчининг ўзи томонидан жамоага ўтказиладиган босим ҳал қилувчи аҳамиятга эга бўлиши мумкин деб ҳисобламоқда. Хусусан, Альварес клуб машғулотларига бойкот эълон қилиш вариантини кўриб чиқмоқда. Яъни, жамоанинг 10 августга белгиланган илк машғулотига чиқмаслиги мумкин.

Альварес 2024 йилдан бери Мадриднинг «Атлетико» клубида тўп суриб келмоқда. Бунгача аргентиналик форвард «Манчестер Сити» ва «Ривер Плейт» шарафини ҳимоя қилган.