Жорий мавсумлараро танаффусда «Тоттенхэм»га ўтган ҳимоячи Эндрю Робертсон «шпорлар»нинг собиқ футболчиси Ледли Кингга бўлган ҳурмати сабабли ўзининг анъанавий 26-рақамидан воз кечганини тушунтирди.

Кинг 2012 йилда «Тоттенхэм»да ушбу рақам остида тўп сурган охирги ўйинчи бўлган эди. Робертсон «Тоттенхэм»да учинчи рақам остида ҳаракат қилади — у Шотландия терма жамоасида ҳам айнан шу рақамда ўйнайди.

«Албатта, мен «Халл»да ҳам, «Ливерпуль»да ҳам 26-рақамни кийганман, лекин бу ерга келганимда 26-рақам афсонавий Ледли Кинг давридан бери ишлатилмаганини билардим. Мен бу позицияни ҳурмат қиламан. У ажойиб ўйинчи бўлган ва ушбу футбол клуби учун жуда кўп яхшиликлар қилган.

Учинчи рақам мен учун жуда катта аҳамиятга эга — бу миллий терма жамоадаги рақамим. Шотландия терма жамоасидаги "3" рақами билан боғлиқ жуда кўп ёқимли хотираларим бор, шунинг учун бу рақам бўш эканини билганимда бир сония ҳам иккиланмадим.

26-рақам мен учун жуда муҳим ва умримнинг охиригача шундай бўлиб қолади, аммо учинчи рақам ҳам ундан кам аҳамиятга эга эмас. Умид қиламанки, бу рақам билан ҳам 26-рақамдагидек кўплаб ажойиб хотираларни ярата оламан», — деди Робертсон клуб матбуот хизматига берган интервьюсида.