Арда Гюлер таътилдан қайтгач, Мадриднинг «Реал» клуби янги мураббийлар штабида катта таассурот қолдирди. Бу ҳақда AS нашри хабар бермоқда.

Туркиялик ярим ҳимоячи жамоа футболчилари орасида биринчи бўлиб мавсумолди тайёргарликка етиб келди ва дарҳол ажойиб жисмоний ҳолатда эканини кўрсатди. Вальдебебасдаги дастлабки машғулотлардан сўнг мураббийлар штаби вакилларидан бири ўз ҳайратини яширмай, Гюлер майдонда «учаётганини» таъкидлади.

Ўтган мавсумда 21 ёшли футболчи 51 та ўйинда майдонга тушиб, 6 та гол урди ва 14 та голли узатмага муаллифлик қилди.

Ўнг қанотдаги ўрин учун рақобат одатдагидан кўра жиддийроқ бўлади — «Реал» Бернарду Силва билан кучайди, ижарадан Эндрик қайтди, шунингдек таркибда Франко Мастантуоно, Браим Диас ва Родриго қолмоқда.