Миллий чемпионатимизда давом этаётган ёзги трансфер ойнаси вақтида «Навбаҳор» таркибида навбатдаги ўзгариш юз берди. 26 ёшли маҳоратли ярим ҳимоячи Шоҳмалик Комилов Наманган клуби сафини тарк этди.
«Лочинлар» таркибига 2025 йилги мавсум бошида келиб қўшилган футболчи ортда қолган 1,5 мавсум давомида Наманган жамоаси либосида Суперлига ва Ўзбекистон кубоги баҳсларида жами 41 та учрашувда майдонга тушган. Ушбу ўйинларда Комилов ўз ҳисобига 3 та гол ва 5 та голли узатмани ёздириб қўйишга муваффақ бўлди.
«Биз жамоамиз сафида ўтказган ўйинлари учун Шоҳмалик Комиловга миннатдорчилик билдириб, унинг келгуси фаолиятида омад ва зафарлар тилаб қоламиз», — дейилади «Навбаҳор» ПФК матбуот хизмати томонидан берилган расмий ахборотда.
