"Манчестер Юнайтед" "Астон Вилла" ҳужумчиси Олли Уоткинсни кузатиб бормоқда. 30 ёшли форвард учун курашда "Арсенал" ҳам "қизил иблислар"га рақобат туғдириши мумкин. Бу ҳақда The Sun нашри хабар беради.
Манба берган маълумотга кўра, "Манчестер Юнайтед" ҳужумчи Джошуа Зиркзее клубни тарк этган тақдирда Уоткинсни сотиб олиш бўйича таклиф бериши кутилмоқда. "Астон Вилла" англиялик футболчини тахминан 40 миллион фунт стерлинг (46,8 миллион евро) эвазига сотиш вариантини кўриб чиқиши мумкин. Таъкидланишича, Бирмингем клуби "Фенербахче"нинг 30 миллион фунтлик (35 миллион евро) таклифини аллақачон рад этган.
Ўтган мавсумда Уоткинс барча мусобақаларда 55 та ўйинда майдонга тушиб, 21 та гол урди ва бешта голли узатмани амалга оширди. Футболчининг клуб билан амалдаги меҳнат шартномаси 2028 йилнинг ёзига қадар мўлжалланган. Transfermarkt порталида келтирилган маълумотларга кўра, футболчининг амалдаги бозор қиймати 25 миллион еврони ташкил этади.
