Тожикистонда ўтказилган CAFA U-20 Women’s Championship 2026 мусобақаси ўз якунига етди. Сўнгги турда Ўзбекистон U-20 аёллар терма жамоаси мезбон Тожикистон U-20 терма жамоасини 7:0 ҳисобида йирик мағлубиятга учратиб, мусобақа ғолиби бўлди.
Учрашувнинг биринчи бўлимида Наргиза Маматалиева ҳисобни очди. Кейин эса Шаҳзода Алихонова икки марта рақиб дарвозасини ишғол қилиб, жамоамиз устунлигини мустаҳкамлади. Тайм якунига яқин терма жамоа сардори Шаҳноза Деканбоева ҳам гол муаллифлари қаторидан жой олди ва биринчи бўлим 4:0 ҳисобида якунланди.
Иккинчи бўлимда ҳам Виктория Сирота шогирдлари ташаббусни қўлдан чиқармади. Севинч Ғуломова бурчак тўпидан кейин ҳисобни 5:0 кўринишига келтирди. Орадан ўн дақиқа ўтиб, Ёдгора Юсупова пенальтидан аниқ зарба йўллади. Учрашувдаги сўнгги голни эса 78-дақиқада Мария Дахова киритди.
Шу тариқа Виктория Сирота бошчилигидаги Ўзбекистон U-20 аёллар терма жамоаси мусобақани 3 учрашувда 7 очко билан якунлаб, CAFA U-20 Women’s Championship 2026 турнири чемпионига айланди.
