АПЛ клуби «Ипсвич» Япония терма жамоаси ҳужумчиси Дайдзэн Маэданинг «Селтик»дан трансфер қилинганини расман эълон қилди. BBC хабарига кўра, трансфер суммаси тахминан 11,6 миллион еврони ташкил этди, 28 ёшли футболчи билан эса уч йиллик шартнома имзоланди.

«Мен ҳар доим АПЛда ўйнашни орзу қилганман ва ушбу орзумни айнан шу клубда амалга ошираётганимдан жуда бахтиёрман. «Ипсвич» вакиллари билан мулоқот жуда манзур бўлди ва илк суҳбатлардан оқ клуб томонидан билдирилган ишончни ҳис қилдим», — деди Маэда шартнома имзоланганидан сўнг.

«Менинг мақсадим ҳар доим бир хил — охиригача курашиш, голлар уриш, голли узатмалар бериш ва жамоа манфаати учун қўлимдан келган барча нарсани қилиш», — дея қўшимча қилди у.

Маэда 2022 йил бошидан бери «Селтик»да тўп суриб келаётган эди ва 4 ярим мавсум давомида жамоанинг ҳақиқий тимсолларидан бирига айланди. У Глазго клуби сафида 212 та ўйинда майдонга тушиб, 79 та гол урган ва 5 марта Шотландия чемпионлиги, 3 марта мамлакат Кубоги ҳамда 2 марта Шотландия лигаси Кубогини қўлга киритган.