«Арсенал» 2026/27 йилги мавсум учун академиянинг 9 нафар ёш футболчиси билан шартнома имзолади. Эндиликда бу иқтидорлар кейинги икки йил давомида клуб тизимида маҳоратини ошириб боришади.
Ушбу рўйхатдан ҳимоячилар Ҳаким Абубакар, Элион Мбала, Даниэль Маккаррон ва Анжелину Педро, яримҳимоячилар Эмерсон Нванери, Тео Одажи-Укуэко ва Чарли Пёрди, шунингдек, ҳужумчилар Жейден Оба ҳамда Жошуа Сесей жой олди.
Уларнинг айримлари ўз ёшидан катталар жамоасида майдонга тушишга ҳам улгурган. Масалан, Нванери УЕФА Ёшлар лигаси ва Премьер-лиганинг дубль таркиблар ўртасидаги мусобақасида ўйнаган бўлса, Маккаррон Шимолий Ирландиянинг «Данганнон Свифтс» клубида катталар футбол тажрибасига эга бўлиб улгурган. Ёш футболчилар ушбу қувончли воқеани «Эмирейтс» стадионида ўтказилган махсус тадбирда оила аъзолари ва клуб мураббийлари даврасида нишонлашди.
