«Ливерпуль» «ПСЖ» вингери Брэдли Барколанинг трансфери бўйича дастлабки музокараларни ўтказди, аммо клублар ўртасида расмий алоқалар ҳали бошлангани йўқ. Бу ҳақда журналист ва инсайдер Бен Джейкобс X ижтимоий тармоғида хабар берди.
Манба берган маълумотга кўра, битимнинг тақдири трансфер нархига боғлиқ: «ПСЖ» футболчи учун 170 миллион евро талаб қилмоқда, «Ливерпуль» эса бу маблағни ҳаддан ташқари ошириб юборилган ва нореал деб ҳисоблайди. Мерсисайдликларнинг асосий вазифаси — суммани камайтиришга эришиш, чунки Баркола уларнинг бу ёздаги бош трансфер нишони бўлиб турибди.
Қайд этилишича, «Ливерпуль» ўтган ёзда ҳам, футболчи тахминан 85 миллион еврога баҳоланаётган вақтда уни сотиб олишга уриниб кўрган эди. Энди эса «қизиллар» икки баравар кўп пул тўлаш ниятида эмас. Бироқ парижликларнинг бундай юқори нарх белгилаши АПЛдаги трансфер бозори ва ички йирик битимлар (хусусан, Эллиот Андерсоннинг «Манчестер Сити»га ҳамда Морган Рожерснинг «Челси»га қимматга ўтиши) билан изоҳланмоқда.
Англия клуби раҳбарияти агар бу ёзда келишувга эришилмаса, «ПСЖ» 2027 йилда Барколани жуда арзонга бой бериши мумкин деб ҳисобламоқда, чунки француз янги шартнома имзолашни хоҳламаяпти. Унинг амалдаги келишуви 2028 йилнинг ёзигача мўлжалланган.
Барколанинг ўзи ҳам, аввалроқ хабар берилганидек, ушбу ёзда «ПСЖ»ни тарк этишга қарши эмас.
Ўтган мавсумда Брэдли барча турнирларда 49 та ўйинда майдонга тушиб, 13 та гол урди ва 7 та голли узатмага муаллифлик қилди. Transfermarkt портали маълумотларига кўра, футболчининг бозор қиймати 90 миллион еврони ташкил этади. ЖЧ-2026 да Баркола Франция терма жамоасининг барча 8 та ўйинида иштирок этиб, 3 та гол урди ва 1 та ассистни ўз ҳисобига ёздириб қўйди.
