«Коло-Коло»нинг янги футболчиси Возинья Чили футбол ассоциацияси қоидалари туфайли клубда ўз тахаллуси остида майдонга туша олмайди. Регламентга кўра, либоснинг орқа томонида фақат футболчининг расмий фамилияси кўрсатилиши мумкин. Футболчининг тўлиқ исм-шарифи — Хосимар Хосе Эвора Диас, шу сабабли у «Диас» ёки «Эвора Диас» вариантини танлаши керак бўлади. Бу ҳақда Globo нашри хабар бермоқда.
Манба маълумотларига кўра, ушбу қарор футболчи учун ҳам, клуб учун ҳам нохуш кутилмаган ҳодиса бўлди. «Коло-Коло» Возинья исми туширилган футболкалар сотувидан даромад олишни режалаштирган эди, чунки Кабо-Вердедан бўлган дарвозабон ЖЧ-2026’даги ёрқин ўйини билан мухлислар эътиборини қозонган эди.
Возинья 2026 йилги Жаҳон чемпионатида тўртта ўйин ўтказиб, улардан иккитасида ўз дарвозаси дахлсизлигини сақлаб қолди. Дарвозабоннинг «Коло-Коло»га ўтишдан олдинги охирги клуби Португалия иккинчи дивизионидаги «Шавиш» бўлган эди. Ўтган мавсумда 40 ёшли голкипер барча турнирларда 19 та ўйинда майдонга тушиб, 6 та баҳсда «нўл»га ўйнади. Transfermarkt портали маълумотларига кўра, футболчининг бозор қиймати 500 минг еврони ташкил этади.
Кабо-Верде терма жамоаси ўз тарихида илк бор Жаҳон чемпионатининг финал босқичида иштирок этди ва 1/16 финалда Аргентинага имкониятни бой бериб (2:3), мусобақадаги иштирокини якунлади.
