Франция терма жамоасининг янги бош мураббийи Зинедин Зидан сўнгги беш йил давомида нима билан шуғуллангани ҳақида гапириб берди.
Зидан 2021 йилда «Реал Мадрид»ни тарк этганидан бери ҳеч қайси жамоада мураббийлик қилмаган эди.
«Мен бу беш йил давомида қўл қовуштириб ўтирганим йўқ. «Реал»да ишлаган давримдагига қараганда анча кўпроқ ўйинларни томоша қилдим. Франция терма жамоасини синчковлик билан кузатиб бордим ва айтишим мумкинки, бу жамоанинг салоҳияти ўта юқори», — деди Зидан.
Шунингдек, Зидан «Реал»дан сўнг бошқа клубларда ишлаш таклифларига рад жавобини бериб, фақатгина Франция терма жамоаси томонидан бўладиган таклифни кутганини ва бу унинг ягона орзуси бўлганини қўшимча қилди. Франция футбол федерацияси 54 ёшли мутахассис билан 2030 йилгача мўлжалланган тўрт йиллик шартнома имзолаганини расман эълон қилди.
