Россиянинг Челябинск шаҳрида ўтказилган Россия очиқ чемпионатида Ўзбекистон терма жамоасининг бир йўла уч нафар аъзоси “Олимпиада-2016” ўйинлари йўлланмалари учун дастлабки рейтинг очколарини қўлга киритганликлари ҳақида маълумот берган эдик.

Мазкур нуфузли мусобақада, шунингдек, ёшлар ва ўсмирлар ўртасида ҳам беллашувлар ўтказилиб, унда умидли, ёш таэквондочиларимиз 3 та олтин (Роман Шин, Ниёз Пўлатов, Нигора Турсунқулова), 1 та кумуш (Комила Акбарова) ва 3 та бронза (Раъно Бойбўтаева, Динарахон Мамадибрагимова, Валентин Хегай) медаллари билан тақдирландилар.

Шу тариқа, жами 5 та олтин, 2 та кумуш ва 3 та бронза медалини қўлга киритган Ўзбекистон терма жамоаси умумжамоа ҳисобида 27 давлат орасида фахрли 2-ўринни эгаллади. Биринчи ўрин мезбонларга насиб этган бўлса, учинчи ўринни қозоғистонлик таэквондочилар банд этишди.