Франция Футбол Федерацияси мамлакатнинг барча миллий терма жамоалари учун янги логотипни тақдим этди.
Янгиланган эмблеманинг дизайни 1920 йилларда Франция миллий жамоалари томонидан қўлланилган Галл хўрозининг биринчи тасвирларидан илҳомланган. "ФФФ" қисқартмаси аввалги логотипларга нисбатан ҳажми кичрайтирилган ва миллий жамоаларнинг ҳам ички, ҳам халқаро миқёсдаги вакиллик ролини таъкидлаш учун эмблемага "Франция" ёзуви қўшилган.
"Ушбу тадбир Франция терма жамоалари учун янги даврнинг бошланишини англатади. Зинедин Зидан кейинги тўрт йил давомида Франция эркаклар терма жамоаси бош мураббийи этиб тайинланганидан сўнг, ФФФ бошқа миллий жамоалар учун бўлажак йирик мусобақаларга, биринчи навбатда Бразилияда бўлиб ўтадиган 2027 йилги аёллар ўртасидаги жаҳон чемпионатига тайёргарлик кўрмоқда.
Бу Франция миллий терма жамоаси брендини ривожлантиришда янги қадамдир. Янги график дизайн билан ФФФ Франция миллий терма жамоаларига турли мақсадлар учун мос келадиган тушунарлироқ воситани тақдим этишга интилади. "Ўзгаришлар Францияда ҳам, халқаро миқёсда ҳам миллий жамоаларнинг кўринишини оширади, шу билан бирга уларнинг тарихи ва рамзлари билан мустаҳкам алоқани сақлаб қолади", дейилади ФФФ баёнотида.
