Fransiya Futbol Federasiyasi mamlakatning barcha milliy terma jamoalari uchun yangi logotipni taqdim etdi.

Yangilangan emblemaning dizayni 1920 yillarda Fransiya milliy jamoalari tomonidan qo‘llanilgan Gall xo‘rozining birinchi tasvirlaridan ilhomlangan. "FFF" qisqartmasi avvalgi logotiplarga nisbatan hajmi kichraytirilgan va milliy jamoalarning ham ichki, ham xalqaro miqyosdagi vakillik rolini ta’kidlash uchun emblemaga "Fransiya" yozuvi qo‘shilgan.

"Ushbu tadbir Fransiya terma jamoalari uchun yangi davrning boshlanishini anglatadi. Zinedin Zidan keyingi to‘rt yil davomida Fransiya erkaklar terma jamoasi bosh murabbiyi etib tayinlanganidan so‘ng, FFF boshqa milliy jamoalar uchun bo‘lajak yirik musobaqalarga, birinchi navbatda Braziliyada bo‘lib o‘tadigan 2027 yilgi ayollar o‘rtasidagi jahon chempionatiga tayyorgarlik ko‘rmoqda.

Bu Fransiya milliy terma jamoasi brendini rivojlantirishda yangi qadamdir. Yangi grafik dizayn bilan FFF Fransiya milliy terma jamoalariga turli maqsadlar uchun mos keladigan tushunarliroq vositani taqdim etishga intiladi. "O‘zgarishlar Fransiyada ham, xalqaro miqyosda ham milliy jamoalarning ko‘rinishini oshiradi, shu bilan birga ularning tarixi va ramzlari bilan mustahkam aloqani saqlab qoladi", deyiladi FFF bayonotida.