Халқаро профессионал футболчилар уюшмалари федерацияси (FIFPRO) ФИФАнинг жаҳон чемпионати ҳуқуқларининг бир қисмини хусусий инвесторларга сотиш режаси юзасидан расмий баёнот билан чиқди.
Баёнотда қуйидагилар таъкидланган:
«FIFPRO ФИФА томонидан FIFA Forward Enterprise ташкил этиш ҳақидаги таклиф юзасидан берилган сўнгги оммавий баёнотни эътиборга олди.
Ушбу таклиф халқаро футболни бошқариш, ташкил этиш ва тижорий ривожлантиришнинг келажагига оид кенгроқ муҳокамаларнинг бир қисми ҳисобланади. Бундай кўламдаги ташаббуслар очиқлик, аниқ жараёнлар ва профессионал футбол келажагидан манфаатдор барча томонлар билан мазмунли мулоқотни талаб қилади.
Сўнгги ойларда FIFPRO ва ФИФА ўзаро англашув меморандуми ҳамда Ижтимоий мулоқот бўйича глобал платформани яратиш орқали ҳамкорликдаги бошқарувни мустаҳкамлаш йўлида муҳим қадамлар ташлади. Ушбу платформа футболчилар, клублар ва лигалар ўртасидаги муносабатларни тартибга солишга қаратилган бўлса-да, у футболни бошқаришнинг келажагида шаффофлик, тизимли мулоқот, холис мезонлар ва жамоавий ривожланиш тамойилларига содиқликни ҳам акс эттиради.
Бу — FIFPRO ва бутун дунёдаги футболчилар касаба уюшмалари доимий равишда ҳимоя қилиб келаётган асосий тамойиллардир. Профессионал футболчилар меҳнат қилувчи шахслар сифатида футболдаги асосий манфаатдор томонлардан бири ҳисобланади. Шунинг учун халқаро футболни бошқариш ва ривожлантиришга оид қарорлар уларнинг меҳнат ва мусобақаларда иштирок этиш шароитларига бевосита таъсир қилади.
FIFPRO бундай аҳамиятга эга таклифлар футболчилар ва бошқа манфаатдор томонларнинг ҳақиқий иштироки билан очиқ ва шаффоф муҳокама қилинишига умид қилади. Футбол ҳамжамиятининг муносабатлари фонида ФИФА футбол индустриясини бўлиш эмас, балки бирлаштириш учун алоҳида масъулиятга эга. Бу каби муҳим қарорлар ультиматумлар эмас, балки ҳақиқий ва инклюзив муҳокама жараёнида қабул қилиниши лозим.
FIFPRO ўз аъзолари ва минтақавий бўлинмалари билан биргаликда вазият ривожини диққат билан кузатишда давом этади. Биз ўз вақтида ахборот олиш ва муҳокама жараёнига жалб этилишни кутамиз ҳамда футболчилар манфаатларини ҳимоя қилиш ва профессионал футболнинг барқарор ҳамда самарали бошқариладиган келажаги йўлида барча томонлар билан конструктив ҳамкорлик қилиш мақсадимизга содиқ қоламиз».
Эслатиб ўтамиз, 30 июль куни УЕФАга аъзо мамлакатлар ФИФА жаҳон чемпионати ва бошқа мусобақаларга оид мулкчилик ҳуқуқларини хусусий инвесторларга берган тақдирда, ФИФА шафелигидаги мусобақаларни бойкот қилиш ниятида эканини маълум қилган эди.
