«Реал Мадрид»нинг собиқ ҳимоячиси Начо Фернандес Жозе Моуриньонинг бош мураббий лавозимига қайтишига муносабат билдирди.

«Якунда совринлар қўлга киритиладими-йўқми, буни айта олмайман, чунки бу футбол ва унда ҳамма нарса мураккаб. Лекин шуни аниқ биламанки, у футболчиларни майдонда бор кучини беришга, 100 фоиз фидойилик кўрсатишга мажбур қилади. У ҳар бир машғулот ва ҳар бир ўйинда талаб қиладиган шиддат... Мен жамоа ичида бўлганман ва сизга ишонч билан айта оламан: улар бор кучлари билан меҳнат қилишади.

Шу сабабли, агар футболчилар ва Моуринью бир тан ва бир жон бўлиб ҳаракат қилишса, «Реал» учун яхши даврлар келишига ҳеч қандай шубҳам йўқ. Моу — «Реал»нинг бир қисми, у ҳақиқий мадридист. Энг муҳими шу: у ушбу клубда ғалаба қозониш ва мағлубиятга учраш нима эканини жуда яхши билади.

Агар футболчилар у билан охиригача бирга бўлишса, «Реал»ни кўплаб ажойиб лаҳзалар кутиб турибди», — деди мадридликларнинг собиқ ҳимоячиси.