«Real Madrid»ning sobiq himoyachisi Nacho Fernandes Joze Mourinyoning bosh murabbiy lavozimiga qaytishiga munosabat bildirdi.

«Yakunda sovrinlar qo‘lga kiritiladimi-yo‘qmi, buni ayta olmayman, chunki bu futbol va unda hamma narsa murakkab. Lekin shuni aniq bilamanki, u futbolchilarni maydonda bor kuchini berishga, 100 foiz fidoyilik ko‘rsatishga majbur qiladi. U har bir mashg‘ulot va har bir o‘yinda talab qiladigan shiddat... Men jamoa ichida bo‘lganman va sizga ishonch bilan ayta olaman: ular bor kuchlari bilan mehnat qilishadi.

Shu sababli, agar futbolchilar va Mourinyu bir tan va bir jon bo‘lib harakat qilishsa, «Real» uchun yaxshi davrlar kelishiga hech qanday shubham yo‘q. Mou — «Real»ning bir qismi, u haqiqiy madridist. Eng muhimi shu: u ushbu klubda g‘alaba qozonish va mag‘lubiyatga uchrash nima ekanini juda yaxshi biladi.

Agar futbolchilar u bilan oxirigacha birga bo‘lishsa, «Real»ni ko‘plab ajoyib lahzalar kutib turibdi», — dedi madridliklarning sobiq himoyachisi.