Трансферлар бўйича эксперт Фабрицио Романонинг хабар беришича, «Ювентус» янги биринчи рақамли дарвозабон излашда давом этаётган бир пайтда, туринликларга «Фрайбург» дарвозабони Ноа Атуболуни сотиб олиш таклиф қилинган.

«Бьянконери» дарвозабонлар трансфер бозорида фаол бўлиб турибди ва бир нечта номзодларни кўриб чиқмоқда. Романо яқинда Атуболу номзоди клуб раҳбариятига тақдим этилганини ошкор қилди.

«Ўтган ҳафтада таклиф қилинган яна бир дарвозабон — бу «Фрайбург» аъзоси Ноа Атуболу бўлди», — деди Романо.

«Сўнгги ойларда бир қатор Италия ҳамда хориж клублари уни синчковлик билан кузатиб боришмоқда», — деб қўшимча қилди у.

Атуболу варианти мавжуд бўлишига қарамай, «Ювентус» айни дамда дарвоза чизиғи учун бошқа номзодларга кўпроқ устуворлик бермоқда.

Романо клуб асосий эътиборни «Сузуки–Викарио ротациясига» қаратганини ва ўзи афзал кўрган нишонлар бўйича музокараларни давом эттираётганини тушунтирди.

Хабар қилинишича, Сион Сузуки трансфери «Пари Сен-Жермен» томонидан билдирилган қизиқишдан сўнг бироз мураккаблашган, Гульельмо Викарио эса Романо таъкидлаганидек, «қулай молиявий шартлар ва тузилма» сабабли жозибадор муқобил вариант сифатида пайдо бўлган.

«Фрайбург» билан 2027 йилнинг июнигача мўлжалланган шартномага эга бўлган Атуболу 20 дан 25 миллион еврогача баҳоланмоқда. Аммо унинг амалдаги шартномаси муддати кам қолгани, агар Турин клуби Бундеслига дарвозабонини сотиб олишга қарор қилса, «Ювентус»нинг музокаралардаги позициясини мустаҳкамлаши мумкин.