«ПСЖ» дарвозабони Люка Шевалье жорий трансфер ойнасидаёқ клубини ўзгартириши мумкин. Бу ҳақда инсайдер Николо Скира Х (собиқ Twitter) ижтимоий тармоғида маълум қилди.

Манба берган маълумотларга кўра, 24 ёшли француз дарвозабони Англия Премьер-лигаси ҳамда Италия А Сериясининг бир нечта клубларига таклиф этилган.

Шу билан бирга, илгарироқ «ПСЖ» Шевалье билан хайрлашишни режалаштирмаётгани ҳақида хабар берилган эди. Бироқ инсайдер Фабрицио Романонинг таъкидлашича, Париж клуби «Парма» дарвозабони Сион Сузукининг вазиятини синчковлик билан кузатиб бормоқда ва унинг трансфери учун катта миқдордаги маблағ таклиф қилишга тайёр.

Шевалье ўтган йилнинг ёзида «Лилль»дан «ПСЖ»га 40 миллион евро эвазига кўчиб ўтган эди. У парижликлар сафида 28 та ўйинда майдонга тушиб, ўз дарвозасидан 28 та тўп ўтказиб юборди ва 10 маротаба дарвозаси дахлсизлигини сақлаб қолди.

Ўтган мавсумнинг иккинчи ярмида француз футболчиси асосий таркибдаги ўрнини бой бериб, биринчи рақамли дарвозабон позициясини россиялик кипер Матвей Сафоновга топшириб қўйди.