«Барселона»нинг ёш футболчиси Хави Эспарт мавсумолди тайёргарлик жараёнидаги ўйинлари билан Ханси Фликда катта таассурот қолдирди. Бу эса унинг келаётган мавсумда асосий таркибдан жой олиш имкониятларини оширди.
Diario SPORT нашрининг хабарига кўра, академия битирувчиси Испания U19 терма жамоаси билан Европа чемпионлигини қўлга киритгач, аъло даражадаги спорт формасида мавсумолди йиғинга етиб келди. У мусобақада асосан таянч ярим ҳимоячиси сифатида ҳаракат қилган эди. Бироқ «Барселона»га қайтгач, Эспарт ўнг қанот ҳимоячиси позициясида муваффақиятли мослашиб олди.
Хабарда таъкидланишича, Флик ва мураббийлар штаби 19 ёшли футболчининг руҳияти, ҳимоядаги ишончли ўйини ва янги позицияда ривожланишга бўлган интилишидан жуда мамнун бўлишган. Эспарт «Бирмингем Сити»га қарши яқинда бўлиб ўтган ўртоқлик ўйинида асосий таркибда майдонга тушди, шунингдек, «Престон Норт Энд»га қарши режалаштирилган баҳс бекор қилингач, жамоа ичидаги машғулот ўйинида ҳам гол уришга эришди.
Яқинда Флик ёш футболчини мақтаб шундай деди: «У ҳам ўйинларда, ҳам машғулотларда ўзининг олий даражадаги футболчи эканини кўрсатди».
Эспартнинг ўзи ҳам ўз мақсадларини аниқ билдирди: «Менинг мақсадим — шу ерда қолиш ва мураббий менга ишонишда давом этиши учун бор кучимни (100%) бераман». У «Барселона»нинг асосий жамоасидан жой олиш учун Эктор Форт билан рақобатлашиши кутилмоқда.
