Осиё футбол конфедерациясида (ОФК) Жанни Инфантинони 2027 йил март ойида бўлиб ўтадиган ФИФА президенти сайловида қайта сайлаш масаласида ягона фикр шаклланмаган.

The Guardian нашрининг хабар беришича, ОФК аввалроқ ФИФАнинг Жаҳон чемпионати ҳуқуқларининг бир қисмини хусусий инвесторларга сотиш режасига қарши чиққан бўлса-да, айрим мамлакатлар Инфантино номзодини қўллаб-қувватлашини билдирган.

Улар қаторида Қатар, Бирлашган Араб Амирликлари, Шри-Ланка, Ливан, Қувайт ва Бутан бор.

ОФКнинг кўплаб аъзолари, жумладан Саудия Арабистони эса бу масала юзасидан ҳозирча ўз позициясини очиқламаган. Хабарга кўра, УЕФА ушбу мамлакатларнинг қўллаб-қувватловига эришишга умид қилмоқда.

Шунингдек, таркибига 11 та миллий футбол ассоциацияси кирувчи Океания футбол конфедерацияси ҳам ҳозирча Инфантинога нисбатан умумий қарорга келмаган.

Янги Зеландия футбол ассоциацияси вакили Эндрю Прагнелл Океания мамлакатларини ушбу масалада ягона позицияни эгаллашга чақирди.