Ярим ҳимоячи Магнес Аклиуш «Монако»дан «ПСЖ»га ўтганидан кейин Париж клуби билан шартнома имзолаганидан сўнгги ҳис-туйғулари билан ўртоқлашди.
Бугун, 6 август куни «ПСЖ» Аклиуш трансферини расман эълон қилди. Футболчи билан 2031 йилга қадар мўлжалланган шартнома имзоланди.
«“Пари Сен-Жермен” билан шартнома имзолаш мен учун улкан фахр. Мен Париж минтақасида вояга етганман ва бундай нуфузли клубга ўтиш мен ҳамда оилам учун жуда катта аҳамиятга эга.
Менга билдирилган ишонч учун президент Нассер Ал-Хелайфи, Луиш Кампуш ва Луис Энрикега, шунингдек, шу йўлда мени қўллаб-қувватлаган барча инсонларга миннатдорчилик билдираман.
Бу либосни кийишни, ушбу буюк клубда янада ривожланишни ва мухлисларимиз олдида «Пари Сен-Жермен» шарафини муносиб ҳимоя қилиш учун бор кучимни сарфлашни интиқлик билан кутяпман», — деди Аклиуш «ПСЖ» расмий сайтига.
Аклиуш «Монако» академияси тарбияланувчиси ҳисобланади. У асосий жамоа сафида 2022 йилнинг ёзидан буён тўп суриб келаётганди.
Ўтган мавсумда ярим ҳимоячи барча мусобақаларда 43 та учрашувда иштирок этиб, 7 та гол ва 11 та голли узатмани амалга оширди. Transfermarkt маълумотига кўра, унинг бозор қиймати 50 миллион еврони ташкил этади.
