«Реал Мадрид» «РБ Лейпциг»нинг 19 ёшли вингери Ян Диоманденинг трансферини амалга оширганидан сўнг, футболчи Германия клуби ва унинг мухлисларига хайрлашув ва миннатдорлик мурожаатини йўллади.

Мадридликлар Кот-д’Ивуар терма жамоаси аъзосини 125 миллион евро ва яна 15 миллион евро бонуслар эвазига сотиб олишди. Бу трансфер Африка футболи тарихидаги ҳамда «Реал Мадрид»нинг энг қиммат харидларидан бирига айланди. Футболчи Испания гиганти билан 2033 йилнинг ёзигача мўлжалланган 7 йиллик шартнома имзолади.

«Мен «РБ Лейпциг»дан жуда миннатдорман. Клуб ва унинг раҳбарияти бир йил олдин, ҳали профессионал даражада бор-йўғи бир нечта ўйин ўтказган вақтимдаёқ менга ишонишган эди. улар менга ишонч билдиришди ва энг юқори даражада ўзимни кўрсатишим учун имконият беришди.

Мен Европанинг етакчи лигаларидан бирида мустаҳкам ўрнашиб олишга, Кот-д’Ивуар терма жамоасидан жой олишга ва ўз мамлакатим шарафини энг йирик турнир — Жаҳон чемпионатида ҳимоя қилишга эришдим. Буларнинг бари «РБ Лейпциг»сиз имконсиз бўларди ва мен бу учун бир умр миннатдор бўлиб қоламан.

«Реал»га ўтиш — бу болаликдаги орзумнинг рўёбга чиқишидир. Шартномам бўлишига қарамай, ушбу трансферни амалга оширишга шароит яратиб берганлари учун «РБ Лейпциг» раҳбариятидан алоҳида миннатдорман.

Мухлисларга эса энг бошиданоқ кўрсатган ажойиб қўллаб-қувватлови учун раҳмат айтаман. Сизнинг иштиёқингиз, менга бўлган ишончингиз ва меҳрингиз сўз билан таърифлаб бўлмайдиган даражада қадрли эди. Менга кўрсатган меҳр-муҳаббатингиз учун ҳамиша миннатдорман.

Бугун янги саҳифа очилмоқда. Хайрлашиш ҳеч қачон осон кечмайди, лекин мен олдинда мени нималар кутаётганини интиқлик билан кутяпман ва «Лейпциг»да ўтказган давримни ҳамиша катта фахр билан эслайман.

Бу клуб юрагимда ҳар доим алоҳида ўрин тутади ва мен унинг ривожланишини синчковлик билан кузатиб бораман. Ким билади дейсиз? Билмадим, балки кунларнинг бирида Чемпионлар Лигасида яна тўқнаш келармиз.

Барчаси учун раҳмат!», — деб ёзди Диоманде.