«Реал» бразилиялик вингер Винисиус Жуниор билан янги шартнома имзоланганини расман эълон қилди. Янги келишув 2032 йилнинг 30 июнигача мўлжалланган.

Ушбу хабардан сўнг 26 ёшли футболчи Instagram тармоғидаги сторис бўлимида клуб раҳбарияти, бош мураббий ва жамоадошларига миннатдорчилик билдирди:

«Сизларни яхши кўраман! Раҳмат, президент [Перес], Моуриньо, Жуни [Калафат], Хосе Анхель [Санчес], футболчилар ва бутун клуб», — деб ёзди Винисиус.

(Маълумот учун: Жуни Калафат — «Реал»нинг бош скаути, Хосе Анхель Санчес — клуб бош директори, Жозе Моуриньо эса жамоанинг янги бош мураббийи ҳисобланади).

26 ёшли футболчи «қироллик клуби» сафида 2018 йилдан бери тўп суриб келмоқда. У шу вақтгача 375 та ўйинда 128 та гол урган, 100 та голли узатмани амалга оширган ҳамда клуб билан 14 та совринни, жумладан 2 марта Чемпионлар Лигаси ва 3 марта Ла Лига чемпионлигини қўлга киритган.