Сеул полицияси пайшанба куни Хон Мён Бонинг Жанубий Корея терма жамоаси бош мураббийи этиб тайинланишидаги қоидабузарликлар бўйича тергов доирасида Корея футбол ассоциацияси (KFA) штаб-квартирасида тинтув ўтказди, деб хабар бермоқда Reuters.

57 ёшли мутахассис 2024 йилда миллий терма жамоа бош мураббийлигига қайтиб келган эди (у аввал 2013–2014 йилларда ҳам жамоани бошқарган). Ўшанда KFA бир неча ойлик чет эллик номзодлар қидирувидан тўсатдан воз кечиб, Хон Мён Бони қисқа учрашувдан сўнг тасдиқлагани кескин танқидларга сабаб бўлган эди. ЖЧ-2026 даги муваффақиятсизликдан сўнг ушбу муаммо яна кун тартибига чиқди.

Манбанинг ёзишича, ҳали 2024 йилнинг октябрь ойидаёқ Жанубий Корея Спорт вазирлиги KFA Хон Мён Бони тайинлашда ўз ички қоидаларини бузганини ва техник директорнинг мураббий билан учрашуви тўлиқ суҳбат (интервью) ҳисобланмаслигини аниқлаган эди. Бироқ ўшанда ноқонуний ҳаракатлар бўйича тўғридан-тўғри далиллар топилмаган.

ЖЧ-2026 турнирида Жанубий Корея терма жамоаси «А» гуруҳида 3-ўринни эгаллаб, плей-офф босқичига чиқа олмади. Мусобақа якунлангач, Хон Мён Бо истеъфога чиқди. Ўтган ойда бўлиб ўтган парламент эшитувида у депутатларнинг тайинлов чоғида имтиёзларга эга бўлгани ҳақидаги айбловларини рад этди, аммо Жаҳон чемпионатидаги муваффақиятсизлик учун масъулиятни ўз зиммасига олди.