«Барселона» Саудия Арабистонининг «Ал-Ҳилол» клубидан португалиялик ҳимоячи Жоау Канселуни тўлиқ сотиб олиш бўйича келишувга эришди. Goal нашри ва испаниялик инсайдер Хуан Хесус маълумотларига кўра, трансфер суммаси тахминан 10 миллион еврони ташкил этади.

32 ёшли футболчи Каталония клуби билан 2 йиллик шартнома имзолаши кутилмоқда. «Барселона» бош мураббийи Ҳанси Флик ушбу трансферни шахсан талаб қилган. Немис мутахассиси ҳимоянинг ўнг қанотини ҳужумларга самарали қўшила оладиган ва катта тажрибага эга бўлган ўйинчи билан кучайтиришни истаган.

Канселу аввалроқ 2023/24 йилги мавсумда «Манчестер Сити»дан ижара асосида «Барселона»да тўп сурган. 2024 йилнинг ёзида у «Ал-Ҳилол»га кўчиб ўтган эди, аммо Саудия Арабистони чемпионатига тўлиқ мослаша олмай, ўтган қишда яна ижара асосида каталонияликлар сафига қайтган эди.

Эндиликда Португалия терма жамоаси аъзоси «Камп Ноу»га доимий асосда қайтишга тўлиқ тайёр.