«Barselona» Saudiya Arabistonining «Al-Hilol» klubidan portugaliyalik himoyachi Joau Kanseluni to‘liq sotib olish bo‘yicha kelishuvga erishdi. Goal nashri va ispaniyalik insayder Xuan Xesus ma’lumotlariga ko‘ra, transfer summasi taxminan 10 million yevroni tashkil etadi.

32 yoshli futbolchi Kataloniya klubi bilan 2 yillik shartnoma imzolashi kutilmoqda. «Barselona» bosh murabbiyi Hansi Flik ushbu transferni shaxsan talab qilgan. Nemis mutaxassisi himoyaning o‘ng qanotini hujumlarga samarali qo‘shila oladigan va katta tajribaga ega bo‘lgan o‘yinchi bilan kuchaytirishni istagan.

Kanselu avvalroq 2023/24 yilgi mavsumda «Manchester Siti»dan ijara asosida «Barselona»da to‘p surgan. 2024 yilning yozida u «Al-Hilol»ga ko‘chib o‘tgan edi, ammo Saudiya Arabistoni chempionatiga to‘liq moslasha olmay, o‘tgan qishda yana ijara asosida kataloniyaliklar safiga qaytgan edi.

Endilikda Portugaliya terma jamoasi a’zosi «Kamp Nou»ga doimiy asosda qaytishga to‘liq tayyor.