1986 йилги жаҳон чемпионати чорак финалида Диего Марадонанинг Англия дарвозасига машҳур «Қўл билан урилган гол»ини киритганида ишлатилган тўп АҚШда аукционга қўйилади.

AFP маълумотига кўра, аукцион 21–23 август кунлари ўтказилади. Тўп учун савдолар 2,5 млн доллардан бошланади, унинг тахминий қиймати эса 10 млн доллардан юқори баҳоланмоқда.

Аргентина мазкур учрашувда Англияни 2:1 ҳисобида мағлуб этган. Марадона ўйинда икки марта гол урган. Унинг иккинчи голи ўз майдони ярмидан бошланган яккакурашдаги ажойиб ҳаракатдан сўнг киритилган бўлса, биринчи голи футболчининг қўли билан урилган ва кейинчалик «Қўл билан урилган гол» номи билан машҳур бўлган.

Маълум бўлишича, учрашувни бошқарган тунислик ҳакам Али Беннасер тўпни ўйиндан кейин олиб қолган ва унга ўз ёрдамчиларининг дастхатларини қўйдирган. У тўпни 30 йилдан ортиқ вақт давомида сақлаган.

Heritage Auctions маълумотига кўра, тўп спорт коллекциялари бўйича ихтисослашган икки компания томонидан экспертизадан ўтказилиб, ҳақиқийлиги тасдиқланган.

Марадонанинг мазкур учрашувда кийган футболкаси эса 2022 йилдаги аукционда 9,3 млн долларга сотилган.