Туркиянинг «Бешиктош» клуби «Арсенал» ҳужумчиси Габриэл Жезус трансфери бўйича Лондон клуби билан алоқаларни қайта тиклади. Бу ҳақда Fanatik хабар берди.

Истанбулликлар янги Суперлига мавсуми олдидан ҳужум чизиғини кучайтиришни режалаштирмоқда. «Бешиктош» раҳбарияти бразилиялик футболчининг вакиллари билан дастлабки расмий музокараларни бошлаган.

Туркия клуби аввалроқ «Арсенал»дан бельгиялик вингер Леандро Троссарни ўз сафига қўшиб олган эди. Энди «Бешиктош» Лондон клубидан яна бир футболчини трансфер қилишга ҳаракат қилмоқда.

Маълумотларга кўра, «Арсенал» 29 ёшли Жезусни 18–25 млн фунт стерлинг оралиғидаги суммага сотишга тайёр.

Бироқ бразилиялик ҳужумчига талаб юқори. Унинг трансферига Италиянинг «Милан» ва «Ювентус» клублари, шунингдек, Бразилиянинг «Палмейрас» жамоаси ҳам қизиқиш билдирмоқда.