А Серияга қайтган «Фрозиноне» таркибини бирданига икки австриялик футболчи — Романо Шмид ва Флориан Гриллич билан кучайтирганини эълон қилди. Бу ҳақда Италия клуби матбуот хизмати хабар берди.

Романо Шмид Италия чемпионатига Германия Бундеслигасидан йўл олди. У бунга қадар Бременнинг «Вердер» клуби шарафини ҳимоя қилиб келаётган эди.

Флориан Гриллич эса Португалиянинг «Брага» клубидан «Фрозиноне»га ўтди. У билан бир мавсумга мўлжалланган шартнома имзоланди.

DerbyDerbyDerby.it маълумотига кўра, Гриллич Италияда тўп тепишни доимо орзу қилганини таъкидлаган.

Эслатиб ўтамиз, Италия А Сериясида янги мавсум 22 август куни старт олади. «Фрозиноне» чемпионатдаги илк учрашувини ўз майдонида Туриннинг «Ювентус» клубига қарши ўтказади.