"Монако" ҳужумчиси Фоларин Балогунинг трансфер қиймати маълум бўлди.
L'Équipe нашри маълумотига кўра, америкалик ҳужумчига Англия Премьер-лигасининг икки клуби — "Ньюкасл" ва "Тоттенхэм" жиддий қизиқиш билдирмоқда.
"Тоттенхэм" аллақачон футболчининг эҳтимолий трансфери бўйича дастлабки алоқаларни амалга оширган. Музокаралар жараёнида "Монако" Балогуни тахминан 60 миллион еврога сотишга тайёр экани маълум бўлган.
Шунингдек, 25 ёшли футболчига Туркиянинг "Галатасарой" клуби ҳамда Саудия Арабистони жамоалари ҳам қизиқиш билдирмоқда.
Балогу ўтган мавсум барча мусобақалар доирасида "Монако" сафида 43 та ўйинда майдонга тушиб, 19 та гол урди ва 5 та голли узатмани амалга оширди.
