Ўзбекистон Суперлигасининг 17-туридан ўрин олган қизиқарли учрашувлардан бири бугун, 13 август куни «Андижон» ва «Нефтчи» жамоалари ўртасида бўлиб ўтади.

Баҳс Андижон шаҳридаги «Бобур Арена»да соат 19:00 да старт олади. Учрашувни Futbol TV телеканали орқали томоша қилиш мумкин.

ЎзПФЛ тақдим этган статистикага кўра, «Андижон» ва «Нефтчи» шу кунга қадар ўзаро 53 марта тўқнаш келган. Тарихий натижалар бўйича фарғоналиклар катта устунликка эга.

«Нефтчи» 53 та учрашувнинг 36 тасида ғалаба қозонган. «Андижон» эса рақибини 9 марта мағлуб этишга муваффақ бўлган. Яна 8 та баҳсда ғолиб аниқланмаган.

Голлар нисбатида ҳам «Нефтчи»нинг устунлиги яққол кўринади. Фарғона клуби ўзаро учрашувларда «Андижон» дарвозасига 103 та гол урган бўлса, андижонликлар 42 марта жавоб қайтарган.

Жамоалар ўртасидаги ўйинларда «Андижон» қайд этган энг йирик ғалаба 3:1 ҳисобида бўлган. «Нефтчи»нинг энг катта ғалабаси эса 7:1 ҳисобида қайд этилган.