Ла Лиганинг 1-туридан ўрин олган «Сельта» ва «Осасуна» жамоалари ўртасидаги учрашув Вигодаги стадион майсасининг ҳолати ёмонлашгани сабабли қолдирилди.
Ўйин 16 август куни «Балаидос» стадионида бўлиб ўтиши керак эди. Кўчиришга майдон газонига инфекция тушгани ва бунинг оқибатида майдон ўйин ўтказиш учун яроқсиз ҳолга келиб қолгани сабаб бўлди.
«Ўтган ҳафтада Ла Лига томонидан ўтказилган текширув давомида майдонни зарарлаган касалликларни йўқотиш бўйича қилинган ишлар ва майсанинг спорт учун талаб қилинадиган сифат ҳамда хавфсизлик стандартларига мос келиши тасдиқланган эди. Бироқ сўнгги кунлардаги об-ҳаво шароити ўйин майдони ҳолатига салбий таъсир кўрсатди, бу эса учрашувни кўчириш бўйича қарор қабул қилинишига олиб келди», — дейилади «Сельта» баёнотида.
Хабар қилинишича, ушбу учрашув 27 августга кўчирилган.
