Европа лигаси учинчи саралаш босқичининг бир қатор жавоб учрашувлари пайшанба куни якунланди.

Туркиянинг «Бешиктош» клуби ўз майдонида «Градец Кралове»ни қабул қилиб, 1:0 ҳисобида ғалаба қозонди. Учрашувдаги ягона гол Вацлав Черни томонидан киритилди. Голга Жуниор Олайитан ассистентлик қилди.

Шу тариқа, «Бешиктош» Европа лигаси саралашининг ҳал қилувчи — плей-офф босқичига йўл олди. Туркиянинг яна бир клуби «Фенербахче» ҳам саралашдаги юришини давом эттириб, плей-офф босқичига чиқди.

Кипрнинг «Омония» клуби ҳам «Линкольн»ни минимал ҳисобда мағлуб этиб, кейинги босқичга йўл олди.

Шунингдек, Австриянинг «Зальцбург» клуби Кипрнинг «Пафос» жамоаси тўсиғидан ўтиб, саралаш плей-оффи иштирокчисига айланди.

Венгриянинг «Ференцварош» клуби ҳам ўз мухлисларини хурсанд қилди. Жамоа икки учрашув натижасига кўра «Гурник» қаршилигини синдириб, Европа лигаси саралашидаги курашни давом эттирадиган бўлди.