«Бобур арена»да ўтган Суперлига 17-туридан ўрин олган «Андижон» — «Нефтчи» учрашувидан (0:3) кейин фарғоналиклар бош мураббийи Ислом Исмоилов матбуот анжуманида иштирок этди.
Мутахассис водий дербисидаги ғалаба, жамоасининг тактик режаси, Усмонали Исмоналиевнинг четлатилиши, футболчилар орасидаги жароҳатлар ҳамда ёш ҳимоячи Абдуғаниевнинг ўйини ҳақида фикр билдирди.
— Ўйин ҳақида фикрингиз?
— Биринчи навбатда, ажойиб ғалаба билан мухлисларимизни табриклайман. Улар стадионда ажойиб атмосфера яратишди. Худди ўз уйимизда ўйнагандек бўлдик.
Ўйин оғир кечишини билардик. Чунки бу водий дербиси, қолаверса, иккала жамоа ҳам ҳужумкор футбол намойиш этади. Шунга қарамай, ғалаба қозондик.
Лобановскийнинг бир гапи бор: «Натижа қолади, ўйин унутилади». Баъзида сифатли ўйнамасангиз ҳам, натижа муҳим бўлади.
Учрашув олдидан футболчиларга кўрсатма бераётганда, асосан, ўйин интизомига эътибор қаратдик. Бунга сабаб бўладиган омиллар кўп эди. Баҳсни юқори интенсивликда бошлай олмасдик. Шу боис интизом биз учун муҳим эди.
Биринчи бўлимда «Андижон» ташаббусга кўпроқ эга бўлгандир. Биз уларга ўйнаш учун имконият бердик ва бу олдиндан ишлаб чиқилган режамизнинг бир қисми эди.
Иккинчи таймда темпни бироз оширдик ва ўз футболимизни намойиш эта бошладик. Рақибни хато қилишга мажбур қилдик.
Ҳимоядан пас орқали чиқишга ҳаракат қилдик, аммо майдон сифати бунга унчалик имконият бермади. Шу сабабли узун пасларга кўпроқ мурожаат қилишга тўғри келди. Қисқа паслардан эса асосан рақиб жарима майдони яқинида фойдаланишга ҳаракат қилдик.
Биринчи таймда ҳаводаги курашлардан кейинги иккинчи тўпларни кўп бой бердик. Танаффусдан сўнг эса ўзимизга хос прессингга қайтишга қарор қилдик ва шу орқали рақибни кўпроқ хатога мажбур этдик.
Умуман олганда, «Андижон» ҳам яхши ўйин кўрсатди. Жамоада яхши мураббий ишлаяпти. Ўйлайманки, бу мураббий билан «Андижон» ҳали кўплаб ютуқларга эришади.
— Усмонали Исмоналиевнинг қизил карточка олиши ўйин натижасига таъсир қилдими?
— Бу футбол, ҳар қандай вазият юз бериши мумкин. Балки рақиб 11 киши бўлиб ўйнаганида ҳам голимизни урардик.
Ўша вазиятгача бўлган жараёнга қарасак, иккинчи таймни ҳужумкор бошлагандик ва айнан шу орқали рақибни хатога мажбур қилдик.
Вазиятга яқин тургандим. Рақиб футболчиси атайлаб қўпол ўйнамади, аммо қоида ҳамма учун бир хил. Қоидаларга кўра, бу 100 фоизлик қизил карточка эди.
Албатта, четлатиш ўйинга таъсир қилган бўлиши мумкин. Лекин биз футболчиларимизга ишондик ва олдиндан ишлаб чиқилган режамиз бор эди. Биринчи таймга қараганда иккинчи бўлимда ўйинимизни барибир кучайтирмоқчи эдик.
— Бунгача асосан ҳимояда ўйнаган Муҳсин Убайдуллаев бугун ярим ҳимояда ҳаракат қилди. Бу тактик қарормиди?
— Ҳа, бу жароҳатлар билан боғлиқ. Жароҳат олган футболчиларимиз кўпайиб кетди. Йован Йокич, Аброр Исмоилов, Анвар Ғофуров сафдан чиқди, бугун эса Ратиньо жароҳат олди.
Бундай вазиятда жамоани кейинги учрашувларга қандай тайёрлаш масаласи пайдо бўлади. Асосий етакчи футболчиларимиз бирин-кетин сафдан чиқмоқда.
Бошқа имкониятимиз йўқ эди. Икром Алибоевни нега захирада қолдирдик? Чунки унинг учта сариқ карточкаси бор эди. «Бухоро» билан бўладиган учрашувни ҳам ҳисобга олиб, уни захирада сақламоқчи эдик. Афсуски, у бугун тўртинчи сариқ карточкасини олди ва яна бир футболчимиз кейинги баҳсни ўтказиб юборадиган бўлди.
Муҳсин бу позицияда аввал ҳам ўйнаган. Уни бунга ўтган учрашувдаёқ тайёрлай бошлагандик. «Қизилқум»га қарши баҳснинг сўнгги 20 дақиқасида айнан «Андижон» билан ўйин учун айрим ўзгаришларни синаб кўрдик. Муҳсин ўша вазиятда ўзини оқлаган эди.
— Ёш футболчи Абдуғаниевнинг ўйини ҳақида нима дея оласиз?
— Унинг ўйини кишини қувонтиради. Айниқса, турнир жадвалида биринчи ўринда бораётган «Нефтчи»дек жамоада бундай ёш футболчининг майдонга тушаётгани унинг ўзи учун катта ютуқ.
Мураббий сифатида биз ҳам катта таваккал қиляпмиз. Шу билан бирга, бошқа имкониятимиз ҳам йўқ. У ҳозиргача билдирилган ишончни тўлиқ оқламоқда.
Агар ишлашдан тўхтамаса, Ҳусанов даражасидаги юқори савияли ҳимоячига айланиши мумкин. 18 ёшида Суперлигада жуда ишончли ўйнаяпти. Бунгача уч-тўртта учрашувда майдонга тушган бўлса, бирорта жиддий хатога йўл қўймади.
— Ёзги трансферлар вақтида «Андижон» «Нефтчи» футболчилари Иззатилло Пўлатов ва Асилбек Жумаевга қизиққанди. Уларнинг маҳоратини ошириш учун «Андижон»га бериш мумкин эмасмиди?
— Пўлатовни беришни истагандик, кейинчалик «Андижон»нинг ўзи бундан воз кечди.
Асилбек Жумаевга келадиган бўлсак, Аброр Исмоилов жароҳат олганидан кейин бу позицияда футболчини сақлаб қолишимиз шарт эди.
— Бир қатор футболчилар жароҳат сабаб сафдан чиқмоқда. ОЧЛ Элитда бундай йўқотишлар билан қандай иштирок этмоқчисизлар?
— Ўзим ҳам ҳайронман. Бу масалани мураббийлар штаби билан яна муҳокама қиламиз. Ҳозир бирор нарса дейиш қийин.
Ҳар бир учрашув оғир кечмоқда. Агар бундай йўқотишлар давом этса, ёш футболчиларга ҳам кўпроқ имконият беришга мажбур бўламиз.
Вазиятдан чиқиб кетишга ҳаракат қиляпмиз. Ёзги танаффусдан кейин учрашувлар янада қийин кечмоқда. Қаердадир очко йўқотяпмиз, қаердадир футболчиларимиз сафдан чиқмоқда.
Умид қиламанки, бу вазиятдан чиқиб кетамиз. Насиб қилса, ОЧЛ Элит баҳсларигача барча футболчиларимиз сафга қайтади, — деди Ислом Исмоилов.
