Россиялик таниқли мутахассис Фёдор Гаглоев «Динамо» мураббийлар штабида расман иш бошлади.
Фёдор Иванович футболчилик фаолияти давомида Россиянинг бир қатор клублари шарафини ҳимоя қилган. 1984 йилда собиқ Иттифоқ ёшлар терма жамоаси сафида ёшлар ўртасида Европа чемпиони бўлган. Шунингдек, у собиқ Иттифоқ спорт устаси унвони билан тақдирланган.
Гаглоев Ўзбекистон футболига ҳам бегона эмас. У 1991 йилда Юрий Саркисян қўл остида Фарғонанинг «Нефтчи» клуби сафида тўп сурган.
Мураббийлик фаолияти давомида эса Владикавказнинг «Алания», Нижний Новгороднинг «Локомотив» ва Ставрополнинг «Динамо» клубларида ишлаган.
59 ёшли мутахассис жорий йил июль ойида «Динамо» мураббийлар штабига қўшилган эди. Энди у клуб билан расмий шартнома имзолади ва ёрдамчи мураббий сифатида фаолият олиб боради.
«Динамо» ПФК Фёдор Гаглоевга клубдаги фаолиятида омад тилаб, унинг тажрибаси ва мураббийлик маҳорати жамоа натижаларига муносиб ҳисса қўшишига ишонч билдирди.
