Франциялик ярим ҳимоячи Поль Погбанинг рафиқаси Зулай доимий жароҳатлар туфайли футболчини фаолиятини якунлашга чақираётганларга муносабат билдирди.

Аввалроқ 33 ёшли футболчи машғулотларда жароҳат олганидан сўнг «Монако» у билан шартномани бекор қилиши мумкинлиги ҳақида хабарлар тарқалган эди.

«Поль фаолиятини якунлаши керак ёки у футболга пул учун қайтди, деб айтаётганларнинг ҳаммасига аниқлик киритмоқчиман: унинг қачон нафақага чиқишини фақат Худо билади. Унинг пул учун қайтганини айтаётганларга эса: ишончингиз комил бўлсин, Худога шукур, пулимиз билан ҳаммаси жойида, дейман.

Ижтимоий тармоқлар ҳамма нарсани кўтаради. Одамлар экран ортида ўтириб, хоҳлаган нарсасини айтишлари, кимнидир ҳақорат қилишлари ва унинг ниятини сўроқ остига олишлари мумкин, лекин экраннинг у томонида тирик инсон турганини унутишади.

У яна нимани исботлаши керак деб сўраётганларга эса эслатиб ўтаман: у дунёдаги ҳар бир футболчи орзу қиладиган орзуни амалга оширди. У ўз мамлакати шарафини ҳимоя қилиб, Жаҳон чемпиони бўлди», — деб ёзди Зулай ижтимоий тармоқдаги саҳифасида.