Англиянинг “Вест Ҳем” клуби исроиллик 27 ёшли футболч Манор Соломонни ўз сафига қўшиб олди. Бироқ футболчининг Ғазодаги уруш фонида Исроилни очиқчасига қўллаб-қувватлаб келаётгани ижтимоий тармоқларда мухлисларнинг жиддий эътирозига сабаб бўлмоқда.
Премер Лигадан тушиб кетган Лондон клуби ушбу футболчини “Тоттенҳэм”дан сотиб олди. Шартнома қиймати дастлаб 5 миллион фунт (6,75 млн доллар) этиб белгиланган, бироқ бонуслар билан бу сумма 7 миллион фунтгача (9,45 млн доллар) кўтарилиши мумкин.
Исроиллик футболчининг келиши қатор баҳс-мунозараларни келтириб чиқарди. Соломон 2023-йил октябрь ойидаги воқеалардан сўнг ўзининг Instagram саҳифасида “Исроил ўзини ҳимоя қилишга ҳақли” эканини ёзиб, кузатувчиларини “Исроил учун ибодат қилишга” чақирган эди. Шунингдек, у фаластинликларни ўз халқини ўлдиришда айблаган постларни ҳам улашган.
Бундай хатти-ҳаракатлар унинг аввалги жамоаларида ҳам муаммо келтириб чиқарган. Хусусан, 2025-йилнинг сентябрь ойида “Вильярреал”га ўтганида, испан клуби мухлислари ижтимоий тармоқларда бойкот эълон қилган эди. Кейинчалик “Севилья”га қарши сафар учрашувида стадионда Фаластин байроқлари кўтарилиб, футболчига нисбатан ҳуштакбозлик қилинган.
Айни пайтда “Вест Ҳэм”нинг ижтимоий тармоқларидаги саҳифалари ҳам икки қутбга бўлинган: баъзилар “Фаластинга озодлик” деб ёзаётган бўлса, бошқалар Исроил байроғини қолдириб, Соломонни қўллаб-қувватламоқда.
Клуб мухлислари бу борада турлича фикрда. Жумладан, 28 ёшли мухлис Каллум Гордон спорт ва сиёсатни ажратиш тарафдори эканини билдирди: “Мен уни фақат футболчи сифатида баҳолашни ва майдонда қандай фойда келтира олишига эътибор қаратишни афзал кўраман”.
20 ёшли Лола Райт исмли мухлис эса Ғазодаги ҳолатни геноцид деб ҳисоблашини ва Соломоннинг позициясига қарши эканини таъкидлади: “Унинг яхши футболчи эканини инкор этиб бўлмайди. Аммо бу мавсум биз учун жамоавий руҳ ва мухлислар ўртасидаги боғлиқлик муҳимроқ. Бу трансфер ҳар иккала жиҳатга салбий таъсир кўрсатиши аниқ”
Футболчининг Исроил армиясида хизмат қилгани борасидаги хабарлар ҳам танқидларни янада кучайтирмоқда. Гарчан унинг бевосита жанговар ҳаракатларда иштирок этгани ҳақида аниқ далиллар бўлмаса-да, фаластинликлар учун бу ҳолат барибир оғриқли қабул қилинади.
Маълумот ўрнида, Фаластин Футбол Ассоциацияси статистикасига кўра, 2026-йилнинг 12-феврал ҳолатига қадар Ғазодаги спорт ҳамжамиятининг 1007 нафар вакили, жумладан, 565 нафар футболчи ҳалок бўлган. Ҳудуддаги 265 та спорт иншоотига жиддий зарар етказилган.
