«Болонья»нинг янги ҳужумчиси Артём Довбик янги мавсум олдидан ўз спорт формаси ва «Рома»дан кетиш тафсилотлари ҳақида сўзлаб берди.

Украиналик 29 ёшли форвард июль ойи охирида «Рома»дан «Болонья»га ўтган эди. Клублар ўртасидаги ижара шартномаси 2027 йил 30 июнгача мўлжалланган бўлиб, унда 17 миллион евро эвазига сотиб олиш опцияси ҳам кўзда тутилган. Шунингдек, «Рома» футболчи маошининг бир қисмини (3,5 миллион евро) тўлаб бериши хабар қилинган.

Ўз формаси ва янги жамоаси ҳақида:

«Италияда сиз ҳали мени энг яхши спорт формамда кўрмадингиз, лекин буни шу ерда кўрсата олишимга умид қиламан ва ишонаман. Ҳозир яна футболдан завқ ола олишимни ҳис қиляпман. Мен бу туйғуни қайтадан кашф этяпман ва клуб учун муҳим эканимни сезяпман».

«Рома»даги қийинчиликлар ва «Милан»га барбод бўлган трансфер ҳақида:

«Ўтган йили мавсумолди йиғини тугагач, «Рома» менга ўйин амалиётига эга бўлиш учун бошқа клубга ўтишим кераклигини айтди. Мен «Милан»га ўтишга жуда яқин эдим, аммо трансфер ойнаси ёпилишига уч кун қолганди ва вақт етмай қолди.

Мавсумни кам ўйин амалиёти билан бошладим ва менга захира ҳужумчиси бўлишимни тушунтиришди. Асосий ўйинчи сифатида узоқ мавсумга тайёрлангандим ва бу вазият билан келишиш жуда қийин бўлди. Тобора камроқ майдонга тушдим, бу энди менга завқ келтирмай қўйди, кейин эса жароҳат олдим. Буларнинг бари ортда қолди, энди шунчаки майдонга тушиб ўйнашни ва завқланишни хоҳлайман».

«Болонья» билан музокаралар ҳақида:

«Спорт директори Марко Ди Вайо тўрт йил аввал «Днепр»да ўйнаб юрган вақтимдаёқ менга қўнғироқ қилганди. Биз буни муҳокама қилиш учун икки-уч марта гаплашганмиз, лекин фақат Украинада ўйнаган ҳужумчи учун сон-саноқсиз пул сарфлаш жуда хатарли эди. Бу ёзда Ди Вайо ва Доменико Тедеско билан яна гаплашдим ва шунчаки айтдим: «Агар мени таркибда кўришни хоҳласангиз, «Болонья» каби клубда қобилиятимга ишонсангиз, мен келаман»», — деди Довбик.

Эслатиб ўтамиз, «Болонья» ўтган мавсумда Серия Ада 8-ўринни эгаллаган эди. Доменико Тедеско шогирдлари янги мавсумнинг 1-турида 22 август куни ўз майдонида «Наполи»ни қабул қилади.