"Арсенал" бош мураббийи Микель Артета Юрриен Тимбернинг майдонга қайтишига ҳали бир неча ҳафта борлигини маълум қилди. Лондон клуби узоқ муддатли чов соҳасидаги жароҳатдан тикланаётган ҳимоячининг реабилитациясида эҳтиёткорлик билан ҳаракат қилмоқда.
Артетанинг айтишича, 25 ёшли футболчи ҳозир машғулотлардаги юклама ва иш ҳажмини босқичма-босқич оширмоқда, аммо тикланиш жараёни ҳали якуний босқичга етмаган.
"Унинг тикланиш жараёни яхши кетмоқда, аммо ҳали яна бир неча ҳафта керак. Бу узоқ вақтдан бери давом этаётган муаммо ва биз ҳар бир қадамни тўғри ташлаётганимизга ишонч ҳосил қилмоқчимиз", — деди Артета.
Тимбер дастлаб март ойида "Эвертон"га қарши учрашувда чов соҳасидан жароҳат олган. Кейинчалик у май ойида "Пари Сен-Жермен"га қарши Чемпионлар лигаси финалида майдонга тушиш учун тикланган, аммо шундан сўнг жароҳат яна безовта қила бошлаган.
Жароҳатнинг қайталаниши оқибатида Тимбер Нидерландия терма жамоасининг 2026 йилги жаҳон чемпионати учун таркибидан четда қолди ва "Арсенал"нинг мавсумолди турнесида ҳам иштирок эта олмади.
Кутилишича, ҳимоячи 16 август куни "Манчестер Сити"га қарши Англия Суперкубоги баҳсини, шунингдек беш кундан кейин "Ковентри Сити"га қарши Премьер-лиганинг 1-тур учрашувини ўтказиб юборади.
Тимбернинг йўқлиги Артета учун айниқса ноқулай вазиятни юзага келтирмоқда. Чунки Вильям Салиба ҳам жаҳон чемпионати вақтида олган бел жароҳати сабаб сафдан чиққан.
Шу боис "Арсенал" ҳимоя чизиғини кучайтириш бўйича изланишларни фаоллаштирган. "Байер" ҳимоячиси Жарелл Куанса ва "Астон Вилла" футболчиси Эзри Конса Лондон клуби билан боғланаётган номзодлар қаторида тилга олинмоқда.
