Суперлига 17-туридан ўрин олган "Динамо" — "Хоразм" учрашуви 2:2 ҳисобидаги дуранг билан якунланди.

Самарқандда ўтган баҳсда ҳисобни 41-дақиқада "Хоразм" ярим ҳимоячиси Рустамжон Абдуҳамидов очди. Шу тариқа, меҳмонлар биринчи бўлимни минимал устунлик билан якунлади.

Иккинчи бўлимда "Динамо" ташаббусни ўз қўлига олди. 63-дақиқада Беҳрузбек Облақулов ҳисобни тенглаштирди.

75-дақиқада захирадан майдонга тушган Жаҳонгирбек Абдусаломов "Динамо"нинг иккинчи голини уриб, мезбонларни олдинга олиб чиқди.

Бироқ самарқандликлар устунликни сақлаб қола олмади. 80-дақиқада Диёрбек Ортиқбоев "Хоразм"нинг жавоб голини киритди ва ҳисобни 2:2 кўринишига келтирди.

Қолган дақиқаларда жамоалар ғалаба голини ура олмади ва учрашув дуранг билан якунланди.

"Динамо" 22 очко билан 8-ўринда, "Хоразм" 20 очко билан 11-поғонада.