Ироқнинг Al-Rabiaa Sports телеканали «Пахтакор»нинг Ўзбекистон Суперлигасидаги учрашувларини мамлакат ҳудудида эксклюзив трансляция қилиш ҳуқуқини қўлга киритди.

Эндиликда ироқлик мухлислар Тошкент клубининг миллий чемпионат доирасидаги барча ўйинларини тўғридан тўғри кузатиб бориш имконига эга бўлади.

Мазкур келишувга «Пахтакор» сафида Ироқ миллий жамоасининг бир йўла уч нафар футболчиси — Айман Ҳусайн, Башар Ресан ва Зайд Таҳсин тўп сураётгани асосий омиллардан бири бўлган. Ироқ оммавий ахборот воситалари ва мухлислари сўнгги вақтларда ушбу футболчиларнинг Ўзбекистондаги фаолиятига катта қизиқиш билдирмоқда.

Хусусан, ироқлик футболчиларнинг «Пахтакор» таркибидаги ўйинлари, голлари ва натижалари маҳаллий спорт нашрларида мунтазам ёритиляпти. «Ал-Халиж» нашри ҳам ироқлик мухлисларнинг Тошкент клубига қизиқиши айнан шу учлик билан боғлиқ эканини қайд этган.

Янги трансляция келишуви «Пахтакор»га Ироқ медиа бозорига кириб бориш, хориждаги аудиториясини кенгайтириш ва клуб брендини Ўзбекистондан ташқарида оммалаштириш имконини беради. Шу тариқа, Тошкент жамоаси Ироқда ҳам ўз мухлислари доирасини шакллантиришга киришмоқда.