Ўзбекистон Суперлигаси 17-турида кутилган голлар — xG кўрсаткичи бўйича энг яхши натижа қайд этган жамоалар маълум қилинди. Статистик маълумотлар HUDL платформаси томонидан тақдим этилган.
Турнинг энг юқори натижаси «Навбаҳор» ҳисобига ёзилди. Наманганликлар «Бунёдкор»га қарши ўйинда 4,23 xG кўрсаткичини қайд этди ва учрашувда тўртта гол урди. Сермаҳсул баҳс 4:3 ҳисобида «Навбаҳор» фойдасига якунланди.
Иккинчи ўринни 2,64 xG билан «Нефтчи» эгаллади. Фарғоналиклар «Андижон» майдонида учта гол уриб, 3:0 ҳисобида ишончли ғалабага эришди.
17-турдаги энг юқори xG кўрсаткичлари:
- «Навбаҳор» — 4,23;
- «Нефтчи» — 2,64;
- «Сўғдиёна» — 2,29;
- «Сурхон» — 1,74.
«Сўғдиёна» ва «Сурхон» ўзаро баҳсда ушбу рўйхатнинг учинчи ҳамда тўртинчи ўринларини эгаллади. Жиззахликлар 2,29 xG кўрсаткичи билан учта гол урган бўлса, «Сурхон» 1,74 xG'дан фақат бир марта фойдаланди. Учрашув «Сўғдиёна»нинг 3:1 ҳисобидаги ғалабаси билан тугади.
xG — жамоа яратган голли вазиятларнинг сифати ва улардан гол урилиш эҳтимолини ифодаловчи статистик кўрсаткич. У зарба берилган масофа, бурчак, узатма тури ва бошқа омиллар асосида ҳисобланади.
