Испаниянинг машҳур El Chiringuito TV дастури журналисти Эду Агирре "Барселона"нинг Родрини таркибга қўшиш ҳаракатига муносабат билдирди. Унинг фикрича, каталонияликлар испаниялик ярим ҳимоячини фақат жамоани кучайтириш учун эмас, балки унинг "Реал Мадрид"га ўтишига йўл қўймаслик мақсадида ҳам танлаган.
"Албатта, мен Родрини "Реал Мадрид" сафида кўришни истардим. У ажойиб футболчи ва уни "Реал" либосида кўрсам, хурсанд бўлардим.
"Барселона" уни "Реал Мадрид" сотиб олмаслиги учун олиб келганига шубҳам йўқ", — деди Агирре.
Журналист каталонияликларнинг ҳаракатини сўнгги трансфер жараёнлари билан ҳам боғлади. Унинг таъкидлашича, "Барселона" Хулиан Альваресни қўлга киритиш борасидаги муваффақиятсиз уринишлардан кейин мухлисларга катта трансфер тақдим этишни истаган.
"Менимча, Хулиан Альварес билан боғлиқ вазиятлардан кейин "Барса" унинг келмаслигини тушуниб етди. Бунинг устига, "Реал Мадрид" трансфер бозорида муваффақиятли ишлади. Шундай шароитда Лапорта: "Жаҳон чемпионатининг энг яхши футболчиси Родри билан шартнома имзоласам, мухлислар мени олқишлайди", деб ўйлаган бўлиши мумкин", — деди у.
Шу билан бирга, Агирре Родрининг футболчилик савиясига шубҳа қилмаслигини, аммо "Барселона" таркибида шу позицияда ўйнай оладиган Марк Бернал борлиги сабабли бу трансферни спорт нуқтайи назаридан зарур деб ҳисобламаслигини қайд этди.
"Родри — шубҳасиз, ажойиб футболчи. Лекин менимча, "Барселона" уни олиб келишга муҳтож эмасди. Чунки уларда Марк Бернал бор", — деди журналист.
Айни пайтда, Британия матбуоти "Барселона" ва "Манчестер Сити" Родри трансфери бўйича тахминан 65,4 млн фунтлик келишувга эришгани, футболчи эса Каталонияга тиббий кўрикдан ўтиш учун етиб келганини хабар қилмоқда. Ҳозирча "Барселона" томонидан трансфер расман эълон қилинмаган.
Родри 2026 йилги жаҳон чемпионатида Испания миллий жамоаси билан бош совринни қўлга киритди ва турнирнинг энг яхши футболчиси сифатида "Олтин тўп" мукофотига сазовор бўлди.
Аввалроқ футболчи "Реал Мадрид" билан ҳам боғланган, аммо музокаралар якунига етмаганидан кейин "Барселона" трансфер учун фаол ҳаракат бошлагани хабар қилинганди.
Марк Бернал эса "Барселона" академияси тарбияланувчиси бўлиб, таянч яримҳимоячиси позициясида ҳаракат қилади. Шу боис Агирре Родрининг келиши ёш футболчининг жамоадаги ролига ҳам таъсир қилиши мумкин, деган нуқтайи назарни илгари сурмоқда.
