Ўзбекистон миллий жамоасининг собиқ футболчиси Ильяс Зейтуллаев "Евро-Футбол.Ру" нашрига берган интервьюсида Ўзбекистон ва Россия терма жамоалари ўртасида кузда ўртоқлик учрашуви ўтказилиши мумкинлиги ҳақида фикр билдирди.
— Россия ва Ўзбекистон терма жамоалари ўртасидаги эҳтимолий учрашувга қандай қарайсиз?
"Россия терма жамоаси доим яхши рақиб бўлиб келган. Ўзбекистон учун бу яхши синов учрашуви бўлади. Бу жуда яхши янгилик.
Россия терма жамоаси санкциялар сабаб халқаро мусобақаларда иштирок этмаётган бўлса-да, барибир топ даражадаги терма жамоалардан бири. Уларнинг таркиби жуда кучли. Сўнгги йилларда уларга ўйин амалиёти етишмаяпти, аммо Россияни ҳеч қачон ҳисобдан чиқариб бўлмайди. Чунки улар доимо кучли жамоага эга бўлган", — деди Зейтуллаев.
— Ўзбекистон бу ўйинда фаворит бўладими?
"Менимча, йўқ. Лекин охирги ўзаро учрашувдан буён Ўзбекистон терма жамоаси анча ўсди. Қолаверса, жаҳон чемпионатида иштирок этиб, катта тажриба тўплади. Яхши ўйин бўлиши мумкин. Биз Россия терма жамоаси билан тенгма-тенг рақобатлаша оламиз", — деди собиқ футболчи.
Аввалроқ Ўзбекистон ва Россия терма жамоалари ўртасидаги учрашув 25 сентябрь куни Нижний Новгородда ўтказилиши мумкинлиги хабар қилинганди.
