O‘zbekiston milliy jamoasining sobiq futbolchisi Ilyas Zeytullayev "Evro-Futbol.Ru" nashriga bergan intervyusida O‘zbekiston va Rossiya terma jamoalari o‘rtasida kuzda o‘rtoqlik uchrashuvi o‘tkazilishi mumkinligi haqida fikr bildirdi.
— Rossiya va O‘zbekiston terma jamoalari o‘rtasidagi ehtimoliy uchrashuvga qanday qaraysiz?
"Rossiya terma jamoasi doim yaxshi raqib bo‘lib kelgan. O‘zbekiston uchun bu yaxshi sinov uchrashuvi bo‘ladi. Bu juda yaxshi yangilik.
Rossiya terma jamoasi sanksiyalar sabab xalqaro musobaqalarda ishtirok etmayotgan bo‘lsa-da, baribir top darajadagi terma jamoalardan biri. Ularning tarkibi juda kuchli. So‘nggi yillarda ularga o‘yin amaliyoti yetishmayapti, ammo Rossiyani hech qachon hisobdan chiqarib bo‘lmaydi. Chunki ular doimo kuchli jamoaga ega bo‘lgan", — dedi Zeytullayev.
— O‘zbekiston bu o‘yinda favorit bo‘ladimi?
"Menimcha, yo‘q. Lekin oxirgi o‘zaro uchrashuvdan buyon O‘zbekiston terma jamoasi ancha o‘sdi. Qolaversa, jahon chempionatida ishtirok etib, katta tajriba to‘pladi. Yaxshi o‘yin bo‘lishi mumkin. Biz Rossiya terma jamoasi bilan tengma-teng raqobatlasha olamiz", — dedi sobiq futbolchi.
Avvalroq O‘zbekiston va Rossiya terma jamoalari o‘rtasidagi uchrashuv 25 sentyabr kuni Nijniy Novgorodda o‘tkazilishi mumkinligi xabar qilingandi.
