"Барселона"нинг янги футболчиси Энтони Гордон жамоадаги дастлабки таассуротлари билан ўртоқлашиб, каталонияликлар сафига ўтиш қарорида бош мураббий Ханси Фликнинг футбол фалсафаси муҳим роль ўйнаганини айтди.
"Менинг "Барселона" футболчиси сифатидаги биринчи ҳафтам ажойиб ўтди. Янги шаҳар, янги мамлакат, янги жамоадошлар ва мураббийлар штаби — ҳаммаси янгича. Лекин барча мени жуда илиқ кутиб олди", — деди англиялик вингер.
Гордоннинг айтишича, у "Барселона"га келмасидан аввал ҳам Фликнинг ғоялари билан таниш бўлган.
"Мураббийнинг ўйин услубини аввалдан билардим. Айнан шу сабаб бу ерга келишни истадим. Менга бундай футбол ёқади", — деди у.
Англиялик футболчи Жоан Гампер кубогида "Ал-Аҳли"га қарши баҳсда Spotify Camp Nouда илк бор "Барселона" либосида майдонга тушишни интиқлик билан кутаётганини ҳам таъкидлади.
"Стадионни кўриш, мухлислар олдида "Барса" либосида ўйнаш жуда ҳаяжонли. Гол уриб, жамоага ғалаба келтиришни истайман. Мухлисларнинг қўллаб-қувватлашига эса кўплаб голлар ва совринлар билан жавоб қайтаришга ҳаракат қиламан", — деди Гордон.
