"Ювентус"нинг аргентиналик қанот ҳужумчиси Нико Гонсалес фаолиятини Туркиянинг "Бешиктош" клубида давом эттириши мумкин. Бу ҳақда Calciomercato хабар берди.
Гонсалес "Атлетико"даги ижарадан сўнг Туринга қайтди, бироқ у "Ювентус"нинг узоқ муддатли режаларига кирмайди. Футболчининг ўзи ҳам клубни тарк этиш истагида.
"Бешиктош" аргентиналик футболчини кейинчалик сотиб олиш ҳуқуқи билан ижарага олиш вариантини кўриб чиқмоқда. Маълум шартлар бажарилса, ушбу банд мажбурий харидга айланиши мумкин.
Гонсалес ўтган мавсумда худди шундай схема асосида "Атлетико"га ижарага берилганди. У Мадрид клуби сафида 37 та учрашувда майдонга тушиб, 5 та гол урди.
Transfermarkt портали Нико Гонсалеснинг бозор қийматини 22 миллион еврога баҳоламоқда. Аввалроқ футболчи "Милан" ва "Интер"нинг ҳам трансфер режаларидан жой олгани ҳақида хабарлар тарқалганди.
