"Ницца" клуби расмий сайти орқали "Зенит"нинг собиқ ярим ҳимоячиси Аксель Витсель билан шартнома имзолаганини эълон қилди.

37 ёшли бельгиялик футболчи жорий ёзда "Жирона"дан кетгач, эркин агентга айланган эди. У "Ницца" билан яна бир мавсумга узайтириш имконияти мавжуд бўлган бир йиллик шартнома имзолади.

Аввалроқ ОАВда "Ницца" Витселни тизза хочсимон боғламларидан жароҳат олган Лоран Абержелга ўринбосар сифатида кўраётгани ҳақида хабарлар тарқалган эди.

Transfermarkt портали Витселнинг бозор қийматини 1,3 миллион еврога баҳоламоқда.

2025/26 йилги мавсумда Витсель Ла Лигада 32 та ўйинда майдонга тушиб, 1 та гол урди ва 2 та голли узатмани амалга оширди. 2026 йилги жаҳон чемпионатида эса у 2 та учрашувда иштирок этиб, 1 та сариқ карточка олди.

Витсель фаолияти давомида "Стандард", "Бенфика", Дортмунднинг "Боруссия", "Атлетико" ва "Тяньцзинь Тэда" клубларида ҳам тўп тепган.